ފުރަތަމަ 100 ދުވަހުގެ ”ވައުދު ފޮތް“ މާދަމާ ނެރެނީ!

ޑރ.މުޙައްމަދު މުއިއްޒުގެ ވެރިކަމުގެ ފުރަތަމަ 100 ދުވަހުގެ ތެރޭގައި ކުރިއަށްގެންދާނެ މަޝްރޫއުތަކާއި، އިންތިހާބުގެ ތެރެއިން ވީ ހުރިހާ ވައުދުތަކެއް ހިމެނޭ ”ވައުދު ފޮތް“ މާދަމާ ލޯންޗުކުރައްވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.

އިންތިހާބީ ރައީސް ވިދާޅުވީ ރިޔާސީ ޓިކެޓު ލިބުނު ހިސާބުން ފެށިގެން، އިންތިހާބުގެ ދެބުރު ވެސް ރަށްރަށަށް ކެމްޕެއިނަށް ގޮސް ދެއްކި ވާހަކަތައް ނޯޓުކޮށްފައި ވާނެ ކަމަށާއި، ހުރިހާ ވައުދެއް ހިމެނޭ ފޮތެއް ނެރުއްވަނީ އެއްވެސް ކަމެއް ރައްޔިތުންނަށް ފޮރުވަން ބޭނުން ނުވާތީ ކަމުގައެވެ. އަދި އެ ވައުދުތަކަކީ އިހްލާސްތެރިކަމާއެކު ހިތުގެ އަޑިން، ކޮށްދިނުމުގެ ނިޔަތުގައި ވެފައިވާ ވައުދުތަކެއް ކަން ސާބިތުކޮށްދިނުމަށް ކަމަށްވެސް އެމަނިކުފާނު ވަނީ ވިދާޅުވެފައެވެ.

މާލޭ ސޯޝަލް ސެންޓަރުގައި ނޫސްވެރިންނާއެކު ރޭ ބޭއްވި ބައްދަލުވުމެއްގައި ވާހަކަފުޅު ދައްކަވަމުން އިންތިހާބީ ރައީސް ވަނީ ނޫސްވެރިންނާއި މެދު އެމަނިކުފާނު ވިސްނަވާ ވަރު ވެސް ސާބިތުކޮށްދެއްވާފައެވެ. އެގޮތުން މީޑިއާތަކަށް ފައިސާ ދެއްވާ މީޑިއާތައް ކުރިއަރުވަން ވަޢުދު ވެވަޑައިގެން ފުރަތަމަ ވެރިއަކީވެސް ޑރ.މުއިއްޒު އެވެ.