ގެދޮރުވެރިޔާ ސްކީމްގެ ދަށުން ދޭ ފްލެޓްތަކުގެ މަސައްކަތް ހުއްޓާލަން އަނެއްކާވެސް އޭސީސީއިން އަންގައިފި

އަންނަ ހުކުރު ދުވަހަށް ދައުރު ހަމަވާ މި ސަރުކާރުގެ ގެދޮރުވެރިޔާ ސްކީމްގެ ދަށުން ދޫ ކުރަން ހަމަޖެހިފައިވާ ފްލެޓް ތަކުގެ މަސައްކަތް ހުއްޓާލަން އެންޓި ކޮރަޕްޝަން ކޮމިޝަން (އޭސީސީ) އިން ރޭ އަންގައިފި އެވެ.

ގެދޮރުވެރިޔާ ސްކީމްގެ ދަށުންދޭ ފުރަތަމަ 4000 ފްލެޓްގެ ދާއިމީ ލިސްޓަށް ޝަކުވާ ބަލާއިގަތުމަށްފަހު ރޭ ވަނީ “ދާއިމީ ލިސްޓް” އަނެއްކާވެސް ހައުސިން މިނިސްޓްރީން ނެރެފައިއެވެ. 7000 އަށް ވުރެ ގިނަ ޝަކުވާ 5ދުވަސް ތެރޭގައި ހުށައަޅާފައިވާ އަރުގައި ދާއިމީ ލިސްޓަށް ބަދަލު އަންނަ ޝަކުވާއެއް ލިބިފައިނުވާކަމަށް މިނިސްޓްރީއިން ބުނެއެވެ.

މިސަރުކާރުގެ ގެދޮރުވެރިޔާގެ ސްކީމްގެ ފުރަތަމަ ބުރުގައި ޝަރުތުހަމަވާ 13,000 ވެއެވެ. އޭގެ ތެރެއިން ފުރަތަމަ 4000 ފްލެޓް ލިބެނީ 3 ކޮޓްރި ފްލެޓް ޝަރުތުހަމަވާ މީހުންގެ ތެރެއިން 76 ޕްއިންޓަށްވިރެ މަތިން ޕްއިންޓު ލިބުނު މީހުންނަށެވެ. އަދި 2 ކޮޓްރި ފްލެޓް 73 ޕޮއިންޓަށް ވުރެ މަތިން ލިބުނު މީހުންނަށެވެ.

އޭސީސީގެ ތަހުގީގަށް އެނގިފައިވާ ގޮތުގައި، ފްލެޓްތަކަށް ޝަރުތު ހަމަވާ މީހުންތަކެއް ޝަރުތު ހަމަވާ ކަމަށް ކަނޑައަޅައި އެ މީހުންނަށް ޕޮއިންޓް ދިނުމާއި ފޯމުތައް އިވެލުއޭޓް ކުރިއިރު، އުސޫލާ ހިލާފަށް ބައެއް މީހުންނަށް ޕޮއިންޓް ދިނުމެވެ.

އޭސީސީއިން ފްލެޓްގެ މަސައްކަތް ހުއްޓާލަން މިނިސްޓްރީއަށް އެންގި ނަމަވެސް ރެއިން ފެށިގެން ގުރުއަތު ނަގަން ފަށައިފައެވެ. އަދި ގުރުއަތުނެގުން ދަނީ ލައިވް ކޮށް ދައްކަމުންނެވެ.