ޖުމްހޫރީ ވެރިކަމެއްގެ ފޮނި މީރުކަން ލިބޭނީ، ސަރުކާރާއި ރައްޔިތުން ގުޅިގެން މަސައްކަތް ކުރުމުން: ޑރ.މުޢިއްޒު

ޖުމްހޫރީ ވެރިކަމެއްގެ ފޮނި މީރުކަން ލިބިގެންދާނީ، ސަރުކާރާއި ރައްޔިތުން ގުޅިގެން، ޤައުމު އިސްކޮށް މަސައްކަތްތަކެއް ކުރެވިގެން ކަމަށް އިންތިޚާބީ ރައީސް ޑރ.މުޙައްމަދު މުޢިއްޒު ވިދާޅުވެއްޖެއެވެ.

މިއަދާއި ހަމައަށް މި ޖުމްހޫރީ ނިޒާމު ގެނެސްދެއްވުމަށް މަސައްކަތް ކުރެއްވި ރައީސުންނަށާއި، ކެބިނެޓްގެ ބޭފުޅުންނަށާއި، ވިޔަފާރިވެރިންނަށާއި، ސިޔާސީ ވެރިންނަށާއި، ޤައުމު މި ހިސާބަށް ގެނައުމުގައި، މަސައްކަތް ކުރެއްވި އެންމެހާ ރައްޔިތުންނަށް ދުވަހުގެ ތަހުނިޔާ އަރިސް ކުރައްވާ ކަމަށް ވެސް އެމަނިކުފާނު ވިދާޅުވިއެވެ.

"އަޅުގަނޑުމެންގެ ޤައުމަށް ހަމަޖެހުން އަންނަން އެބަޖެހޭ، އެންމެން އެކަތިގަނޑަކަށްވާން ޖެހޭ، އެހެންވީމަ، މި ގޮތުގައި ކުރިއަށް ދިޔުމަށް ހުރިހައި ބޭފުޅުންނަށް، މި ތަހުނިޔާ އަރިސް ކުރަމުން އަޅުގަނޑު އިލްތިމާސް ކުރަން." ޑރ.މުޢިއްޒު ވިދާޅުވިއެވެ.

އިންތިޚާބީ ރައީސް ޑރ.މުޢިއްޒު އަކީ ދުވެހި ޖުމްހޫރިއްޔާގެ އަށްވަނަ ރައީސްއެވެ.

ޑރ.މުޢިއްޒު ވެރިކަމުގެ ހުވާ ކުރައްވާނީ މި މަހުގެ 17 ވަނަ ދުވަހުއެވެ. އިންތިޚާބީ ރައީސް ޑރ.މުޢިއްޒު ވެރިކަމުގެ ހުވާ ކުރެއްވުމުން ޑރ.މުޢިއްޒު ވެވަޑައިގަންނަވާނީ ދިވެހި ޖުމްހޫރިއްޔާގެ އަށްވަނަ ރައީސްއަށެވެ.