އެމްއެންޕީގެ ނާއިބު ރައީސާ މިރްފަތު ޕާޓީން ވަކިވެ ޕީޕީއެމް/ޕީއެންސީ ފަހަތަށް!

މޯލްޑިވްސް ނެޝަނަލް ޕާޓީ (އެމްއެންޕީ)ގެ ނާއިބު ރައީސާ މިރްފަތު އިސްމާޢީލް ޝަފީގު އެ ޕާޓީން ވަކިވެއްޖެއެވެ. 

މިކަމާއި ގުޅިގެން މިރްފަތު ވިދާޅުވީ، މީގެ މަހެއްހާ ދުވަސްކުރިން އޭނާ އެޕާޓީން ވަކިވެފައިވާ ކަމަށެވެ. އަދި ޕާޓީ ދޫކުރީ އެއްވެސް މައްސަލައެއް ޖެހިގެން ނޫން ކަމަށާ، އެކަން ކުރީ އަމިއްލަ ސަބަބު ތަކަކަށްޓަކައި ކަމަށެވެ. 

މިރްފަތު އިތުރަށް ބުނެފައި ވަނީ އޭނާ ހުރީ މިވަގުތު އެއްވެސް ޕާޓީއެއްގައި ނޫން ކަމަށާ، އެހެން ނަމަވެސް ކުރިއަށް އޮތް ތަނުގައި ޕީޕީއެމް ނުވަތަ ޕީއެންސީން ފެނިދާނެ ކަމުގައެވެ. 

އެގޮތުން، ކުރިއަށް އޮތް މަޖިލީސް އިންތިޚާބުގައި ޕީޕީއެމް/ޕީއެންސީ ޓިކެޓްގައި ވާދަކުރެއްވުމުގެ ވިސްނުން އޭނާގެ ހުންނެވި އިރު، މުޢިއްޒުގެ ސަރުކާރުގެ މަގާމަކުންވެސް އޭނާ ފެނިދާނެކަމުގެ އިޝާރާތެއް ވަނީ ކޮށްފައެވެ. 

ޕީޕީއެމް/ޕީއެންސީގެ އައު ސަރުކާރުގެ ތެރެއިން ނުވަތަ މަޖިލީހުގެ ތެރެއިންވެސް އެ ކޯލިޝަން ތަމްސީލް ކުރައްވަން މިރްފަތުގެ ޝައުގުވެރިކަން ހުރިއިރު، ނިމިގެންދިޔަ ރިޔާސީ އިންތިހާބުގެ ދެވަނަ ބުރުގައި މިރްފަތު ހުރި ޕާޓީ، އެމްއެންޕީން ކޯލިޝަން ހަދާފައިވަނީ ވެސް ޕީޕީއެމް/ޕީއެންސީއާ އެކުގައިކަން ފާހަގަކޮށްލަންޖެހެއެވެ.