ސްޕްރީމް ކޯޓުގެ ހުކުމާއެކު ނަޝީދު ވަކިކުރުން އަންނަ އާދީއްތަ ދުވަހު

މިހާރު މަޖިލިހަށް ހުށަހެޅިފައިވާ، ރައްޔިތުންގެ މަޖިލިހުގެ އިތުބާރު ނެތްކަމުގެ މައްސަލަ ކުރިޔަށް ގެންދެވޭނެކަމަށް ސުޕްރިމް ކޯޓުން މިއަދު ހުކުމް ކުރުމާއެކު، ނަޝީދު ވަކި ކުރުމުގެ މައްސަލަ އަންނަ އާދީއްތަ ދުވަހަށް ރައްޔިތުންގެ މަޖިލިހުން އެޖެންޑާ ކޮށްފިއެވެ.

ނަޝީދުގެ މައްސަލަ އެޖެންޑާ ކޮށްފައި މިވަނީ، މައްސަލަ އެޖެންޑާ ނުކުރީ ޤާނޫނާއި ޚިލާފަށް ކަމަށް މިއަދު ސުޕްރީމް ކޯޓުން ޙުކުމް ކޮށްފައި ވަނިކޮށެވެ. މި ޙުކުމް އިއްވީ ނަޝިީދުގެ މައްސަލަ އެޖެންޑާ ނުކުރަން، އެމަނިކުފާނުގެ ކޮއްކޮ، އަދި މަޖިލީހުގެ ނައިބު ރައީސާ އީވާ ސަލާމް ވިދާޅުވަމުން ގެންދަވާތާ ގިނަ ދުވަސް ވުމުން، އެމްޑީޕީން މި މައްސަލަ ސުޕްރީމް ކޯޓަށް ދުސްތޫރީ މައްސަލައެއްގެ ގޮތުގައި ވެއްދުމުންނެވެ.

ސުޕްރީމް ކޯޓުގެ ޙުކުމްގައި ބުނެފައިވަނީ މަޖިލީހުގެ ރައީސް މަގާމުން ވަކިކުރުމުގެ މައްސަލަ މަޖިލީހުގެ އިދާރާ އިން ކުރިއަށް ގެންގޮސްފައި ނުވަނީ ގާނޫނު އަސާސީއާ ޚިލާފަށް ކަމަށެވެ.

މަޖިލީހުގެ ރައީސް ވަކިކުރުމުގެ ޤަރާރު ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާގެ ރިޔާސަތު ބަލަހައްޓަން މަޖިލީހުގެ ނައިބު ރައީސް އުޒުރުވެރިވާ ހާލަތުގައި މަޖިލީހުގެ ޤަވާއިދުގެ 44 ވަނަ މާއްދާ އިން މަޖިލީހުގެ ރައީސް އާއި މަޖިލީހުގެ ނައިބު ރައީސް ރިޔާސަތު ބެލެހެއްޓުމަށް އުޒުރުވެރިވެއްޖެ ޙާލަތެއްގައި ރިޔާސަތު ބަލަހައްޓާނެ މެމްބަރުންގެ ގޮތުގައި ކަނޑައަޅާފައިވާ މެމްބަރުންގެ ތަރުތީބުން މަޖިލީހުގެ ރައީސްގެ ގަރާރުގެ މައްސަލަ ހުށަހަޅަން ހަމަޖެހިފައިވާ ނުވަތަ ހުށަހެޅިފައިވާ ޖަލްސާ ކުރިއަށް ގެންދަންޖެހޭނެ ކަމަށްވެސް ޙުކުމުގައި ބުނެފައިވެއެވެ.

މިމައްސަލަ އެޖެންޑާ ކޮށްފައިވަނީ އަންނަ އާދީއްތަ ދުވަހުގެ ހެނދުނު 9:00 އަށެވެ. މިކަން މަޖިލިހުގެ އިދާރާއިން ވަނީ ޔަގީން ކޮށްދީފައެވެ.