މިފްކޯއިން ގަތް ދެ ވަނަ ބޯޓު ރާއްޖެއަށް ދަތުރު ފަށައިފި

މިފްކޯގެ ބޯޓުތައް އިތުރުކުރުމަށް ހިންގި މަޝްރޫއުގެ ދަށުން އެ ކުންފުނިން ގަތް 4 ބޯޓުގެ ތެރެއިން 2 ވަނަ ބޯޓު ރާއްޖެއަށް އައުމަށް ދަތުރު ފަށައިފިއެވެ.

"ޖަޒީރާ 106" ގެ ނަން ދެވިފައިމާ މި ބޯޓު ރާއްޖެއަށް ދަތުރު ފަށާފައިވަނީ ތައިލޭންޓުން މިމަހު 4 ވަނަ ދުވަހުއެވެ. ރާއްޖޭގައި ބޯޓު ބަނދަރު ކުރަނީ މި މަހު 9 ވަނަ ދުވަހުއެވެ. 

ޖަޒީރާ 105 އަދި 104 މިއަހަރު ނިމުމުގެ ކުރިން ރާއްޖެ ގެނެވޭނެ ކަމަށް މިފްކޯއިން ވަނީ ބުނެފައެވެ. 

"މިފްކޯގެ ޖަޒީރާ ސީރީޒްގެ މި ބޯޓުތަކަކީ، ޖުމްލަ 60 ޓަނުގެ ބްރައިން ފްރީޒިން ކެޕޭސިޓީ އަދި 200 ޓަނުގެ މަސް ރައްކާ ކުރެވޭ ކަލެކްޓަރ ވެސަލް ތަކެކެވެ. މިފްކޯއިން ރާއްޖެ ގެންނަ މި ތިން ބޯޓާއެކު މިފްކޯގެ މަސް ގަތުމުގެ ޤާބިލީއްޔަތުކަން ދުވާލަކު 180 ޓަނުން އިތުރު ވެގެން ދާނެ،" -މިފްކޯ-

މިފްކޯގެ ފުރަތަމަ ބޯޓު ޖަޒީރާ 103 މިއަހަރު މާޗު މަހު ވަނީ ގެނެސްފައެވެ. މި ބޯޓުގައި 120 ޓަނުގެ ބްރައިން ފްރީޒް ކެޕޭސިޓީ ހުރިއިރު، ޖުމްލަ 420 ޓަނުގެ މަސް ރައްކާ ކުރެވެއެވެ. މި ބޯޓު ބޮޑަށް ބޭނުން ކުރަނީ ދެކުނުގެ މަސްވެރިކަމުގައެވެ.