ރެއާލް އިން އެމްބާޕޭ ނުގެންނާނެ ސަބަބުތައް ހާމަކޮށްފި

ރެއާލް މެޑްރިޑުން ފްރާންސްގެ ތަރި ކިލިއަން އެމްބާޕޭ އެޓީމަށް ސޮއި ނުކުރާނެކަން ހާމަކޮށްފައިވާކަމަށް ސްޕެއިންގެ ނޫސްތަކުން ބުނަން ފަށައިފި އެވެ.

ފްރާންސްގެ ޕީއެސްޖީއަށް ކުޅެމުން އަންނަ ކިލިއަން އެމްބާޕޭ އެ ކްލަބާ އެކު ހަދާފައިވާ ކޮންޓްރެކްޓް މި ސީޒަނުގެ ނިޔަލަށް ހަމަވާނެ އެވެ. ޕީއެސްޖީ އިން މަސައްކަތްކުރަމުން އަންނަނީ އެމްބާޕޭގެ ކޮންޓްރެކްޓް އާކޮށް ރަނގަޅު ފީއެއްގައި އޭނާ ވިއްކާލުމަށެވެ. ނަމަވެސް އާ ކޮންޓްރެކްޓެއްގައި ސޮއިކުރުމުގެ ޝައުގުވެރިކަމެއް އެމްބާޕޭގެ ނެތެވެ.

ފާއިތުވި ތިން އަހަރުވެސް އެމްބާޕޭގެ ސޮއި ހޯދުމަށް އެންމެ ބޮޑަށް މަސައްކަތްކުރި އެއް ކުލަބަކީ ރެއާލް މެޑްރިޑެވެ. އެމްބާޕޭ ވެސް މެޑްރިޑަށް ދާން ބޭނުންވެގެން ގިނަ މަސައްކަތްތަކެއް ކުރި އެވެ. ނަމަވެސް އެކަން ކާމިޔާބު ނުވެ އޭނާ ޖެހުނީ ޕީއެސްޖީގައި މަޑުކުރާށެވެ.

ކުރިޔަށް އޮތް ސީޒަނުގައި އެމްބާޕޭ ޕީއެސްޖީ ދޫކޮށްލާނެކަން ޔަގީންވެފައިވާއިރު، އޭނާ ހޯދުމަށް މިހާރު ރެއާލްގެ ޝައުގުވެރިކަމެއް ނެތެވެ. ސްޕެއިން މީޑިއާތަކުން ބުނާ ގޮތުން ރެއާލް އިން އެމްބާޕޭ ސޮއިނުކުރަން ނިންމީ މައިގަނޑު ތިން ސަބަބަކާ ހުރެ އެވެ.

ފުރަތަމަ ސަބަބަކީ މުސާރައިގެ ގޮތުގައި އަހަރަކު 20 މިލިއަން ޔޫރޯ އާއި ބޯނަސްގެ ގޮތުގައި ވެސް ބޮޑު ހޭދައެއް އެކުލަބުން އެމްބާޕޭއަށް ހޭދަކުރަން ޖެހުމެވެ.

ދެ ވަނަ ސަބަބަކަށް އެކުލަބުން ޒުވާން ކުޅުންތެރިންނަށް އިންވެސްޓް ކުރާއިރު، އެމްބާޕޭގެ އުމުރު މަތިވުމެވެ. މިހާރު އެމްބާޕޭގެ އުމުރަކީ 24 އަހަރެވެ. އެ ކްލަބުން އެންމެ ފަހުން ސޮއިކުރި ކުޅުންތެރިންވެސް ސޮއިކުރީ ޒުވާން އުމުރުގަ އެވެ.

އަނެއް ސަބަބަކީ ސަޕޯޓަރުންގެ މެދުގައި އެމްބާޕޭގެ މަގުބޫލުކަން ކުޑަވުމެވެ. 2022 ވަނަ އަހަރު ރެއާލްއަށް ނޫނެކޭ ބުނެ އޭނާ ޕީއެސްޖީގައި މަޑުކުރަން ނިންމުމުން އެކުލަބުގެ ސަޕޯޓަރުން ވަނީ ނުރުހުން ފާޅުކޮށް އެމްބާޕޭއާ ދިމާކޮށްފަ އެވެ.

ސަޕޯޓަރުންގެ ނުރުހުން ކުލަބަށް އަމާޒުވުމުގެ އިތުތުން އެމްބާޕޭ ސޮއިކޮށްފި ނަމަ އެކުލަބަށް މާލީ ގޮތުން ވެސް އުނދަގޫތަކެއް ދިމާވެދާނެކަމަށް ބަލައި ރެއާލް އިން ބޭނުންވަނީ ފްރާންސްގެ ތަރި ނުގަނެ ދޫކޮށްލުމަށެވެ.