އޮސްޓްރޭލިއާގެ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރުމަށް ބިލެއް ފާސްކޮށްފި

އޮސްޓްރޭލިއާގެ ޕާލިމެންޓުން ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭނުންކުރުން މަނާކުރުމަށް ޤާނޫނެއް ފާސްކޮށްފައެވެ. މިއީ މިފަދަ އެންމެ ހަރުކަށި ޤާނޫނު ދުނިޔޭގައި ތަންފީޒުކުރެވޭ ޤައުމަށް އޮސްޓްރޭލިއާ ވެގެންދާނެ ކަމެކެވެ. މި މަނާކުރުން ތަންފީޒުކުރަން ފަށާނީ މަދުވެގެން 12 މަސް ދުވަހުގެ ތެރޭގައެވެ. އަދި މި ޤާނޫނާ ޚިލާފުވާ ޓެކްނޮލޮޖީ ކުންފުނިތަކަށް 50 މިލިއަން އޮސްޓްރޭލިއަން ޑޮލަރާ ހަމައަށް ޖޫރިމަނާ ކުރެވިދާނެއެވެ. ބޮޑުވަޒީރު އެންތޯނީ އަލްބަނީޒް މި ޤާނޫނު ޖަސްޓިފައި ކުރައްވާފައިވަނީ ޒުވާނުން ސޯޝަލް މީޑިއާގެ ގެއްލުންތަކުން ސަލާމަތްކުރުމަށް އެޅޭ ފިޔަވަޅެއްގެ ގޮތުގައެވެ. ނަމަވެސް ފާޑުކިޔާ ފަރާތްތަކުން މި ޤާނޫނު ތަންފީޒުކުރުމުގެ ފީސިބިލިޓީ އާއި ޕްރައިވަސީއަށް ކުރާނެ އަސަރާ މެދު ސުވާލު އުފައްދާފައިވެއެވެ.

މިޤާނޫނުގައި ގޭމިންގ އަދި މެސެޖިންގ ޕްލެޓްފޯމްތައް ހިމެނިފައި ނުވިޔަސް، ސްނެޕްޗެޓް، ޓިކްޓޮކް، ފޭސްބުކް، އިންސްޓަގްރާމް، އަދި އެކްސް ފަދަ މައިގަނޑު ސޯޝަލް މީޑިއާ ޕްލެޓްފޯމްތައް ހިމެނެއެވެ. މި ޤާނޫނު ތަންފީޒުކުރާނީ އޮސްޓްރޭލިއާގެ އިންޓަރނެޓް ރެގިއުލޭޓަރ ކަމުގައިވާ އީސޭފްޓީ ކޮމިޝަނަރެވެ. އެގޮތުން އުމުރު ވެރިފައިކުރުމުގެ ޓެކްނޮލޮޖީތައް ބޭނުންކުރާނެއެވެ. ނަމަވެސް ޕްރައިވަސީއާއި، މި ޤާނޫނުގެ ނަތީޖާ އަދި ވީޕީއެން މެދުވެރިކޮށް މި ޤާނޫނު އަޅައުކާލެވިދާނެކަމުގެ ކަންބޮޑުވުންތައް ފާޅުކުރެވިފައިވެއެވެ. ޓެކްނޮލޮޖީ ކުންފުނިތަކާއި ޒުވާނުންގެ ޙައްޤުތަކަށް ވަކާލާތުކުރާ ފަރާތްތަކުން ބުނާ ގޮތުގައި މި ޤާނޫނު ވަރަށް ބޮޑަށް ވޭގްވެފައިވާ އަދި ކުޑަކުދިން ރެގިއުލޭޓް ނުކުރެވޭ އޮންލައިން ތަންތަނަށް ދިއުމުގެ ރިސްކު އޮތް އަދި ޒުވާނުން ނިންމުންތައް ނިންމުމުގެ ޕްރޮސެސްއިން އެކްސްކްލޫޑްކުރާ ޤާނޫނެކެވެ.

މިކަމާ މެދު މީހުންގެ ޚިޔާލު ތަފާތުވި ނަމަވެސް، އޮސްޓްރޭލިއާގެ މައިންބަފައިންނާއި ބެލެނިވެރިންގެ މެދުގައި ކުރެވުނު ޕޯލްތަކުން ދައްކާގޮތުގައި މި ޤާނޫނަށް ވަރަށް ބޮޑު ތާއީދެއް ލިބިފައިވެއެވެ. ބޮޑުވަޒީރު އަލްބަނީޒް މި ޤާނޫނު އަޅާކިޔުއްވާފައިވަނީ ކުޑަކުދިންނަށް ބަނގުރާ މަނާކުރުމާ އެއްފަދައިންނެވެ. އަދި މި ޤާނޫނުގައި އުނިކަންތައްތަކެއް ހުރިކަމުގައި ވިޔަސް މިއީ ކޮންމެހެން ބޭނުން ކަމެއްކަން ފާހަގަކުރައްވާފައިވެއެވެ. ފްރާންސް އަދި އެމެރިކާގެ ޔުޓާ ސްޓޭޓް ފަދަ ތަންތަނުގައި މިފަދަ މަސައްކަތްތައް ކުރުމުގައި ތަންފީޒުކުރުމުގެ ގޮތުން ގޮންޖެހުންތަކާ ކުރިމަތިވެފައިވެއެވެ. ދުނިޔޭގެ ލީޑަރުން އޮސްޓްރޭލިއާގެ މި ފިޔަވަޅު ވަރަށް ބޮޑަށް ފާރަވެރިވެ ބަލަމުންދާއިރު، ނޯވޭ އަދި ޔުނައިޓެޑް ކިންގްޑަމްވެސް ވަނީ މުސްތަޤުބަލުގައި މިފަދަ ފިޔަވަޅުތަކެއް އެޅުމަށް ވިސްނަމުންދާކަމަށް ބުނެފައެވެ.