އަލްޝިފާއިން ތުއްތު ކުދިން ނެރެ ޣައްޒާގެ ދެކުނަށް ބަދަލުކުރަނީ

ޣައްޒާގެ އުތުރުގެ އަލް ޝިފާ ހޮސްޕިޓަލުގައި ޕްރީމެޗަރ 31 ތުއްތު ކުދިން، ތިން ޑޮކްޓަރުންނާއި ދެ ނަރުހުންނާއެކު އެތަނުން ނެރެފިއެވެ.

އަލް ޝިފާ ހޮސްޕިޓަލުގައި އެންމެ ނާޒުކު ބަލިމީހުން އާއި ވަގުތުން އުފަންވާ ދިހަވަރަކަށް ކުދިންގެ ހާލު ސީރިއަސް ވުމުން ޣައްޒާގެ ދެކުނަށް ބަދަލުކޮށްފިއެވެ. އިސްރާއީލުގެ ސިފައިން ބުދަ ދުވަހު ފާސްކުރި އަލް ޝިފާ ހޮސްޕިޓަލަށް ތެލާއި ސިއްހީ ސާމާނު މަދުވުމުން އިންކިއުބޭޓަރު ނެތި ދޫކޮށްލި 39 ތުއްތު ކުދިންގެ ތެރެއިން 31 ތުއްތު ކުދިން ވަނީ އެތަނުން ބަދަލު ކޮށްފައެވެ.

ޣައްޒާގެ ހޮސްޕިޓަލްތަކުގެ ޑިރެކްޓަރު ޖެނެރަލް މުހައްމަދު ޒަޤޫތު ނޫސްވެރިންނަށް ވިދާޅުވީ "އަލް ޝިފާ ހޮސްޕިޓަލުގައި ތިބި ޕްރީމެޗަރ 31 ކުދިން ވެސް ... ތިން ޑޮކްޓަރުންނާއި ދެ ނަރުހުންނާއެކު ނެރެފައިވާ" ކަމަށާއި އެމީހުން މިސްރަށް ވަނުމަށް "ތައްޔާރީތައް ކުރިއަށް އެބަދޭ" ކަމަށެވެ. ޣައްޒާގެ ދެކުނުގެ ނާސިރު ހޮސްޕިޓަލުން ރިޕޯޓް ކުރަމުން އަލްޖަޒީރާގެ ތާރިގު އަބޫ އައްޒޫމް ބުނީ ތުއްތު ކުދިން ޣައްޒާގެ ދެކުނުގެ ހޮސްޕިޓަލްތަކަށް ބަދަލު ކިރުމަށް ދަތުރުކުރަމުންދާ ކަމަށެވެ.

އިސްރާއީލުގެ ސިފައިން ޣައްޒާގެ އަލް ޝިފާ ހޮސްޕިޓަލުގައި ތިބި ޑޮކްޓަރުންނާއި ބަލިމީހުންނާއި ގެދޮރު ދޫކޮށް ދިޔަ މީހުން މެޑިކަލް ކޮމްޕައުންޑް ހުސްކުރުމަށް އަމުރު ކުރުމުން ބައެއް މީހުން ފުރަން މަޖުބޫރުވި ކަމަށް ޑޮކްޓަރުންނާއި ފަލަސްތީނުގެ އޮފިޝަލުން ހޮނިހިރު ދުވަހު އަލްޖަޒީރާއަށް ބުނެފައިވެއެވެ.

ހޮނިހިރު ދުވަހު ހޮސްޕިޓަލަށް ޒިޔާރަތްކުރި ޑަބްލިޔުއެޗްއޯގެ ޓީމަކުން ރިޕޯޓްކޮށްފައިވާ ގޮތުގައި އަދިވެސް އެތައް ސަތޭކަ ބަލިމީހުން އެތަނުގައި ތިބި ކަމަށާއި އޭގެ ތެރޭގައި ގިނަ ބައެއްގެ ހާލު ވަރަށް ސީރިއަސް، ޓްރޮމާ ޕޭޝަންޓުން ވަރަށް ބޮޑަށް އިންފެކްޓްވެފައިވާ ޒަޚަމްތަކާއި، ބުރަކަށީގައި އަނިޔާވެފައިވާ މީހުން ވެސް ހިމެނެ އެވެ.

"އެމީހުން ވާހަކަ ދެއްކި ބަލިމީހުންނާއި ސިއްހީ މުވައްޒަފުން ތިބީ އެމީހުންގެ ސަލާމަތާއި ސިއްހަތަށްޓަކައި ބިރުގަނެ، އަދި ގެއިން ބޭރަށް ނުނިކުތުމަށް އާދޭސްކޮށް،" އަލް ޝިފާ އަކީ މަރުވާ ސަރަހައްދެއްގެ ގޮތުގައި ސިފަކޮށްފައި ކަމަށް، އެ އިދާރާއިން ބުންޏެވެ. ޑޮކްޓަރުން ބުނި ގޮތުގައި ރޭޑްގެ ތެރެއިން ހަތަރު ތުއްތު ކުދިން މަރުވެފައިވެ އެވެ.

ތުއްތު ކުދިން ޣައްޒާގެ ދެކުނަށް ބަދަލުކޮށްފައިވަނީ "ރަފާހުގެ އެމިރޭޓްސް ހޮސްޕިޓަލަށް ބަދަލުކުރުމަށް ތައްޔާރުވުމުގެ ގޮތުން" ކަމަށް ޕީއާރުސީއެސް އިން ބުނެ އެވެ.

ދުވަހުގެ ފަހުކޮޅު ހަމާސްގެ ކޮންޓްރޯލް އޮންނަ ޣައްޒާގެ ހެލްތު މިނިސްޓްރީގެ ތަރުޖަމާނު އަޝްރަފް އަލް ޤިދްރާ ނޫސްވެރިންގެ ބައްދަލުވުމެއްގައި ވިދާޅުވީ ތުއްތު ކުދިން ރަފާގެ ތަލް އަލް ސުލްތާން ހޮސްޕިޓަލަށް ބަދަލުކޮށްފައިވާ ކަމަށާއި މާދަމާ އާއިލާއާއެކު މިސްރުގެ ހޮސްޕިޓަލްތަކަށް ފޮނުވާނެ ކަމަށެވެ.