އަނެއްކާވެސް އިރާގުގައި އެމެރިކާ ސިފައިންގެ މަރުކަޒުތަކަށް ހަމަލާ ދީފި

އިރާގުގައި ގާއިމުވެތިބި އެމެރިކާ ސިފައިން ތިބޭ މަރުކަޒުތަކަކަށް އަނެއްކާ ވެސް ހަމަލާތަކެއް ދީފި އެވެ.

ޑްރޯން ބޭނުން ކޮށްގެން ބުރާސްފަތި ދުވަހު ވެސް އިރާގުގައި ތިން ހަމަލާއެށް އެމެރިކާ ސިފައިންގެ މަރުކަޒުތަކަކަށް އަމާޒުވި ކަމަށް އެމެރިކާގެ އަސްކަރިއްޔާގެ މަސްދަރަކާ ހަވާލާދީ ރޮއިޓާސްއިން ރިޕޯޓުކޮށްފައިވެ އެވެ.

އިޒްރޭލުން ފަލަސްތީނުގެ ގާޒާއަށް މެދުކެނޑުމެއް ނެތި ބޮން އަޅަމުންދާއިރު އެމެރިކާ އިން އަމަލީގޮތުން އިޒްރޭލައް އެހީތެރިވެ އެއްބާރުލުން ދޭތީ ހަމަލާތަކުގެ ރައްދެއްގެ ގޮތުން މެދުއިރުމަތީގައި ހުރި އެމެރިކާގެ ބޭސްތަކަށް އަންނަނީ ހަމަލާ ދެމުންނެވެ.

އޮކްޓޯބަރު 7 އިން ފެށިގެން މިހާތަނަށް އެމެރިކާގެ ސިފައިންގެ މަރުކަޒުތަކަށް 40 އަށްވުރެ ގިނަ ހަމަލާ ދީފައިވެ އެވެ. އަދި އެ ހަމަލާތަކުގައި 56 އެމެރިކާ ސިފައިންނަށް ވަނީ އަނިޔާވެފަ އެވެ.

ހުޅަނގު ބަގުދާދުގައި ހުންނަ ބޭސްއަށް އަމާޒުކޮށް ފޮނުވި ޑްރޯންތަކެށް ވައްޓާލާފައިވާ ކަމަށް އެމެރިކާއިން ވަނީ ބުނެފައެވެ.

މި ހަމަލާތަކުގެ ފަހަތުގައި ވަނީ އީރާން ކަމަށް އެމެރިކާއިން ތުހުމަތު ކުރެ އެވެ. މި ތުހުމަތުތައް އީރާނުން ވަނީ ދޮގުކޮށްފައެވެ.