ޗައިނާގެ ސްޓޭޓް ކައުންސިލަރު ޑރ.މުއިއްޒު ހުވާކުރުމުގެ ރަސްމިއްޔާތށް ރާއްޖެވަޑައިގެންފި

އިންތިޚާބީ ރައީސް ޑރ. މުޙައްމަދު މުޢިއްޒު ހުވާކުރައްވާ ރަސްމިއްޔާތުގައި ބައިވެރިވުމަށް ޗައިނާގެ ސްޓޭޓް ކައުންސިލަރު ޝީއެން ވައި އައިޖިން ރާއްޖެވަޑައިގެންފިއެވެ.

ޗައިނާގެ ސްޓޭޓް ކައުންސިލަރު ރާއްޖެވަޑައިގެންފައިވަނީ އިއްޔެގެ ވަގުތެއްގައެވެ.

އެގޮތުން އެ ކަމަނާއަށް ވެލާނާ އިންޓަރނޭޝަނަލް އެއަރޕޯޓުން މަރުޙަބާ ދެންނެވީ ކުރީގެ ޓޫރިޒަމް މިނިސްޓަރ މޫސާ ޒަމީރެވެ.

މިކަންހާމަކޮށް މޫސާ ޒަމީރު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ އިންތިޚާބީ ރައީސް ހުވާ ކުރައްވާ ރަސްމިއްޔާތުގައި ބައިވެރިވުމަށް ވަޑައިގެންނެވި ޗައިނާގެ ރައީސް ޝީޖިންޕިންގެ ޚާއްސަ މަންދޫބަށް މަރުޙަބާ ދެންނެވުމަކީ ލިބުނު އުފަލެއް ކަމަށެވެ.

ޗައިނާއަކީ ރާއްޖޭގެ ތަރައްޤީގެ މުހިންމު ބައިވެރިއެއް ކަމަށާއި ޗައިނާއާއި އެކީ އޮންނަ ގުޅުމުގެ އަގު ރާއްޖެއިން އަބަދުވެސް ވަޒަން ކުރާނެ ކަމަށް ޒަމީރު ވިދާޅުވިއެވެ.

ޗައިނާގެ ސްޓޭޓް ކައުންސިލަރުގެ މި ދަތުރުފުޅު ނިންމަލާލެއްވުމަށްފަހު ފުރާވަޑައިގަތުމަށް ހަމަޖެހިފައިވަނީ އަންނަ ހޮނިހިރު ދުވަހުއެވެ.

އިންތިޚާބީ ރައީސް ޑރ. މުޙައްމަދު މުޢިއްޒު ހުވާކުރެއްވުމުގެ ރަސްމިއްޔާތު އޮންނާނީ މާދަމާ ހަވީރު 16:45 ގައި ޖުމްހޫރީ މައިދާނުގައެވެ.