ޣައްޒާގެ ހޮސްޕިޓަލްތަކުގެ ވަށައިގެން ހަމަލާތައް ކުރިއަށްދަނީ

ޣައްޒާގެ އަލް ޝުޖައިޔާ ސަރަހައްދުގައި އިސްރާއީލުން ދިން ބޮމުގެ ހަމަލާއެއްގައި ޝަހީދުވި 15 މީހުން އަލް ޝިފާ ހޮސްޕިޓަލަށް ގެންގޮސްފި އެވެ. ފަލަސްތީނުގެ ނޫސް އެޖެންސީ ވަފާ އިން ވެސް ދަނީ ޣައްޒާގެ ދެކުނުގައި އޮންނަ ޚާން ޔޫނިސް އަށް ހައްދުފަހަނަ އަޅައިފައިވާ އިސްރާއީލުން ދިން ހަމަލާތަކާ ގުޅިގެން ނާސިރު ހޮސްޕިޓަލާއި ޔޫރަޕިއަން ހޮސްޕިޓަލަށް ޝަހީދުވި މީހުންނާއި ޒަހަމުވި މީހުން ގެންގޮސްފައިވާ ކަމަށް ރިޕޯޓް ކުރަމުންނެވެ. އިންޑޮނޭޝިއާ ހޮސްޕިޓަލަށް ވެސް ބުދަ ދުވަހު ވެސް އެ ހޮސްޕިޓަލުގެ ކައިރީގައި ވައިގެ ހަމަލާތަކެއް ދީފައިވާއިރު، އެ ހޮސްޕިޓަލުން ވެސް ޒަހަމުވި މީހުނައް ފަރުވާދިނުން ކުރިއަށް ގެންދެ އެވެ. އަންގާރަ ދުވަހުގެ ރޭ ޖަބަލީ ރެފިއުޖީ ކޭމްޕަށް އިސްރާއީލުން ދިން ބޮމުގެ ހަމަލާއެއްގައި ޝަހީދުވި ދެ މީހަކު ވަނީ ޣައްޒާގެ އުތުރުގެ އިންޑޮނޭޝިއާ ހޮސްޕިޓަލަށް ގެންގޮސްފަ އެވެ. ޣައްޒާގެ މެދުތެރޭގައި އޮންނަ ނޫސެއިރާތު ރެފިއުޖީ ކޭމްޕްގައި ހުރި ގެއަކަށް ވެސް އިސްރާއީލުން ދިން ވަރުގަދަ ބޮމުގެ ހަމަލާގައި އެތައް ބަޔަކު ޝަހީދުވެ ޒަހަމްވެފައިވާ ކަމަށްވެސް ވަފާ އިން ވަނީ ރިޕޯޓު ކޮއްފައިވެއެވެ.