އިސްރާއީލުން ޣައްޒާގެ 60 އަށްވުރެ ގިނަ މިސްކިތް ބިމާ ހަމަކޮށްފި

ޔަހޫދީ އިސްރާއީލުން މިދިޔަ މަހުގެ ހަތްވަނަ ދުވަހުން ފެށިގެން ޣައްޒާއަށް ދެމުންގެންދާ ހަމަލާތަކުގައި 60 އަށްވުރެ ގިނަ މިސްކިތް ހަލާކުވެފައިވާ ކަމަށް ރިޕޯޓުތައް ބުނެފިއެވެ.

ފަލަސްތީނުގެ ދައުލަތުގެ މީޑިއާ ވަފާ ނިއުސް އެޖެންސީން ބުނި ގޮތުގައި، އިސްރާއީލުގެ އަސްކަރީ މަތިންދާބޯޓުތަކުން އިއްޔެ ދިން ހަމަލާއެއްގައި ޣައްޒާ ސިޓީގެ ސަބްރާ އަވަށުގައި ހުންނަ އަލްސަލާމް މިސްކިތް ހަލާކުކޮށްފައިވާ ކަމަށެވެ.

އަލްސަލާމް މިސްކިތް ހަލާކުކޮށްލުމާ އެކު އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލު ސިފައިން ހަލާކުކޮށްލި މިސްކިތްތަކުގެ އަދަދު 60 އަށް ވުރެ މައްޗަށް އަރާފައިވާ ކަމަށް ރިޕޯޓުތައް ބުނެއެވެ.

ޔަހޫދީ އިސްރާއީލުން ޣައްޒާއަށް ދެމުންގެންދާ ހަމަލާތަކުގައި މިހާތަނަށް 11،000 އަށްވުރެ ގިނަ މީހުން ޝަހީދުވެފައިވާއިރު، އޭގެ ތެރޭގައި 4،500 އަށްވުރެ ގިނަ ކުޑަކުދިން ހިމެނެއެވެ.