ކޮންމެ ދުވަހަކު ހަތަރު ގަޑިއިރަށް ހަމަލާތަށް މެދުކަނޑައިލަން އިޒްރޭލުން އެއްބަސްވެއްޖެ

ހައްދުފަހަނަ އަޅައިފައިވާ އިސްރާއީލުގެ ސިފައިން ޣައްޒާގެ އުތުރަށް ހުއްޓުމެއްނެތި ދެމުންދާ ހަމަލާތައް ކޮންމެ ދުވަހަކު ވެސް ހަތަރު ގަޑިއިރަށް މެދުކަނޑައިލަން އެއްބަސްވެފައިވާ ކަމަށް އެމެރިކާއިން ބުނެފިއެވެ.

މިކަން އިއުލާންކޮށް، ވައިޓް ހައުސްގެ ޤައުމީ ސަލާމަތާ ބެހޭ ކައުންސިލްގެ ތަރުޖަމާނު ޖޯން ކަރބީ ބުނެފައިވަނީ، އިސްރާއީލުގެ ހަމަލާތައް ހަތަރު ގަޑިއިރަށް ހުއްޓައިލުމަށް އެމީހުން އެއްބަސްވެފައި ވަނީ އެމެރިކާގެ ރައީސް ޖޯ ބައިޑަނާއި އިސްރާޢީލުގެ ބޮޑުވަޒީރު ބެންޖަމިން ނަތަންޔާހޫއާ ދެމެދު ކުރި މަޝްވަރާތަކަކަށް ފަހުގައެވެ. އަދި އެ ނިންމުމަކީ ރަނގަޅު ނިންމުމެއް ކަމަށް ވެސް އޭނާވަނީ ބުނެފައެވެ. 

 ކަރބީ ބުނެފައިވާ ގޮތުގައި އިސްރާއީލުން އެއްބަސްވެފައި ވަނީ، ހަމައެކަނި ޣައްޒާގެ އުތުރުގައިވާ ސަރަޙައްދުތަކަށް ދެމުންދާ ހަމަލާތައް އެވަގުތަށް މެދުކަނޑައިލަން ކަމަށެވެ.

މިގޮތަށް ނިންމާފައިވަނީ އެ ސަރަޙައްދުގައި ދިރިއުޅޭ މުސްލިމުންނަށް ޣައްޒާގެ ދެކުނަށް ދަތުރު ކުރުމުގެ ފުރުޞަތު ދިނުމާއި، ޣައްޒާގައި ހާލުގައި ޖެހިފައިވާ 2.3 މިލިޔަނެއްހާ މީހުންނަށް އިންސާނީ އެހީގެ ސާމާނު ފޯރުކޮށްދެވޭނެ ކަމަށް ވެސް އޭނާ ބުންޏެވެ.

ނަމަވެސް ހަގީގަތުގައި އެކަން ކުރުމުގެ އެންމެ މުހިންމު މަގުސަދަކީ ކުރިންވެސް ބައިޑަން އިއުލާން ކުރި ގޮތަށް ޙަމާސް ޖަމާޢަތުން ރަހީނު ކޮށްފައިވާ އަސީރުން މިނިވަން ކޮށް އެމީހުންގެ މައުލޫމާތު ކަށަވަރު ކުރަން ވަގުތު ހޯދުމުގެ ބޭނުމުގައެވެ.

ހައްދުފަހަނަ އަޅާފައިވާ އިސްރާއީލްގެ ޔަހޫދީން ފަލަސްތީނުގެ މުސްލިމުންގެ ނަސްލު ނައްތާލަން ކުރާ މަސައްކަތަށް މަސް ދުވަހަށްވުރެ ގިނަ ދުވަސްވެފައި ވަނިކޮށް އެފަދަ ނިންމުމެއް ނިންމާފައިވާއިރު، މި އޮކްޓޫބަރު 7 ވަނަ ދުވަހުން ފެށިގެން ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 10،900 އިން މައްޗަށް އަށް އަރާފައެވެ. އޭގެ ތެރޭގައި 4,300 އަށްވުރެ ގިނަ ޢަދަދެއްގެ ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު ވަނީ 24,000 އަށްވުރެ މައްޗަށް އަރާފައެވެ.