ކުޅުދުއްފުށިން ގެއްލުނު އަބްދުﷲ އިބްރާހިމް އަދިވެސް ނުފެނޭ

މިމަހުގެ 3 ވަނަ ދުވަހުން ފެށިގެން އާއިލާއށް ޚަބަރެއްނުވެ ގެއްލިގެން ހޯދަމުން ދަނީ ހދ.ކުޅުދުއްފުށި/ ލަންދޫގެ އަބްދުﷲ އިބްރާހިމް 39 އަހަރުއެވެ.

ފުލުހުން ބުނެފައި ވަނީ ހދ.ކުޅުދުއްފުށި / ލަންދޫގެ، އަބްދުﷲ އިބްރާހިމް (39އ) އާއިލާއަށް ޚަބަރެއްނުވެ ގެއްލިފައިވާ ކަމަށް ނޮވެމްބަރު 3 ވަނަ ދުވަހު ރިޕޯޓުކޮށްފައިވާތީ އޭނާ ހޯދުމުގެ މަސައްކަތް ފުލުހުން ކުރަމުން ދާ ކަމަށެވެ. 

އަބްދުﷲ އިބްރާހިމް އެންމެ ފަހުން ފެނިފައިވަނީ ނޮވެމްބަރު 2 ވަނަ ދުވަހު ހެނދުނު ކުޅުދުއްފުށިން ކަމަށް އޭނާގެ އާއިލާއިން ފުލުހުންނަށް ވަނީ މައުލޫމާތުދީފައެވެ. އަދި ނޮވެމްބަރު 3 ވަނަ ދުވަހުގެ ފަހުން އެއްދުވަހު އޭނާ މާލެ، ވިލިމާލެ ފެރީޓާމިނަލް ކައިރިން އާންމުންގެ މީހަކަށް ފެނުނުކަމަށް އާއިލާ މީހެއްގާތު ބުނެފައިވާ ކަމަށް ވެސް އާއިލާއިން ފުލުހުންނަށް މައުލޫމާތުދީފައިވެއެވެ.

އަބްދުﷲ އިބްރާހިމް ގެއްލިގެން ހޯދުމުގެ މަސައްކަތް ކުރަމުންދާތާ މިއަދަށް 11 ދުވަސް ވަނީ ވެފައެވެ.

 އަބްދުﷲ އިބްރާހީމްގެ އެއްވެސް މައުލޫމާތެއް ލިބިފައިވާނަމަ ފުލުހުންގެ ހޮޓްލައިން 3322111 އަށް ނުވަތަ ކުޅުދުއްފުށި ޕޮލިސް ސްޓޭޝަންގެ ނަމްބަރު 9791382 އަށް ގުޅުއްވައި ހިއްސާކުރެއްވުން އެދެން.