ސޭޓަށް ހަމަލާދިން އަންހެން މީހާ ބަންދުން ދޫކޮށްލައިފި

މާލޭގެ ފިހާރައަކަށް ވަދެ، އެ ފިހާރައިގައި އިން ސޭޓަށް ހަމަލާދިން މައްސަލައިގައި ހައްޔަރުކުރި އަންހެން މީހާ ބަންދުން ދޫކޮށްލައިފިއެވެ.

މި މައްސަލައިގައި ހައްޔަރުކޮށްފައި ވަނީ އުމުރުން 29 އަހަރުގެ ތ. ތިމަރަފުއްޓަށް ނިސްބަތްވާ ފާތިމަތު ޝަހުދާއެވެ.

މިދިޔަ މަހުގެ 7 ވަނަ ދުވަހު ހިނގި އެ ހާދިސާއާ ގުޅިގެން އޭނާ ހައްޔަރުކޮށް އެ ދުވަހު ކްރިމިނަލް ކޯޓުން ވަނީ 15 ދުވަހުގެ މުއްދަތެއް ޖަހާފައެވެ. އެއަށްފަހު މިދިޔަ މަހުގެ 23 ވަނަ ދުވަހު ބަންދުގެ މުއްދަތު ހަމަވުމުން އަނެއްކާވެސް ވަނީ އިތުރު 15 ދުވަހަށް އިތުރުކޮށްފައެވެ.

ނަމަވެސް މައުލޫމާތު ލިބިފައިވާ ގޮތުގައި މި މަހުގެ 7 ވަނަ ދުވަހު އޭނާގެ ބަންދުގެ މުއްދަތު ހަމަވުމުން އޭނާ ވަނީ ދޫކޮށްލާފައެވެ.

އޭނާގެ މައްޗަށް ކްރިމިނަލް ކޯޓުން ކުރި އަމުރުުގައިވާ ގޮތުން އޭނާ ބަންދުގައި ބެހެއްޓުމަށް އަމުރު ކުރި ހާލަތަކީ ޖިނާއި އިޖުރާއަތުގެ ގާނޫނުގެ ދަށުން މުޖުތަމައުގެ ސަލާމަތާއި ރައްކާތެރި ކަމަށްޓަކައެވެ. އަދި އޭނާއަކީ މީގެ ކުރިން ވެސް މިފަދަ ކުށުގެ ރިކޯޑް އޮންނަ މީހެއް ކަމަށް އަމުރުގައި ވެއެވެ.