ތިނަދޫ އިސްލާމީ މަރުކަޒު އައިޔޫއެމްގެ ދަށަށް ބަދަލު ކުރާނަން!

ގދ. ތިނަދޫ އިސްލާމީ މަރުކަޒު، އިސްލާމިކް ޔުނިވާސިޓީގެ ދަށަށް ބަދަލުކުރަން އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ނިންމައިފިއެވެ.

އިސްލާމިކް މިނިސްޓަރުގެ މަޤާމުގެ ހުވާ ކުރައްވައި، މި ނިންމެވުން އެމަނިކުފާނު ވަނީ ރޭ ހާމަކުރައްވައިފައެވެ.

އައު ސަރުކާރުގެ މިނިސްޓަރ އޮފް އިސްލާމިކް އެފެއާޒް ކަމަށް ރޭ އައްޔަން ކުރެއްވި ޑރ. ޝަހީމް ވިދާޅުވީ، ވަނީ ތިނަދޫގައި ގާއިމްކޮށްފައިވާ އިސްލާމީ މަރުކަޒު އަންނަ އަންގާރަ ދުވަހު އައިޔޫއެމް ހަވާލު ކުރައްވާނެ ކަމަށެވެ.

އޭގެ ސަބަބުން އިސްލާމީ ޢިލްމު އުނގެން ބޭނުންވާ ދަރިވަރުން އެ ސަރަހައްދުން މާލެ ނައިސް ކިޔެވޭނެ ގޮތް ފަހިވާނެ ކަމަށް ވެސް ޝަހީމް ވިދާޅުވިއެވެ.

"އިސްލާމީ ހަޟާރަތާއި ސަގާފަތުގެ މަރުކަޒަކަށް ވެގެންދާނެ،" ޝަހީމް ވިދާޅުވިއެވެ.

ތިނަދޫގައި އިސްލާމީ މަރުކަޒެއް ބިނާ ކޮށްފައި ވަނީ ކުރީގެ ރައީސްޔާމީންގެ ވެރިކަމުގައެވެ. އެތަނަށް ނިމިގެން ދިޔަ އެމްޑީޕީގެ ސަރުކާރުން އަޅައިނުލާތީ، ޑރ.ޝަހީމް މީގެ ކުރިން ވެސް ވަނީ ކަންބޮޑުވުންފާޅު ކުރައްވައިފައެވެ.