ވިލިމާލެ އަދި ހުޅުމާލެއިން އައިޑީކާރޑު ދޫކުރަން މިއަދު ފަށައިފި

ދިވެހި ރައްޔިތެއްކަން އަންގައިދޭ ކާޑް ޕްރިންޓްކޮށް ދޫކުރުމުގެ ޚިދުމަތް ވިލިމާލެ، ހުޅުމާލެ ފޭސް 01 އަދި ފޭސް 02ގައި ފަށައިފިއެވެ.

ދިވެހި ރައްޔިތެއްކަން އަންގައިދޭ ކާޑް ޕްރިންޓްކޮށް ދޫކުރުމާއި، ޕާސްޕޯޓު ދޫކުރުމުގެ ޚިދުމަތް ރައްޔިތުންނާ ގާތުން އަވަހަށް ފޯރުކޮށްދިނުމުގެ ކަންކަން މުޅި ރާއްޖެއަށް ފުޅާކުރުމުގެ މަޝްރޫއު ރައީސް ޑރ.މުޢިއްޒް އިފްތިތާހުކޮށްދެއްވީ މިމަހުގެ 16ވަނަ ދުވަހުއެވެ.

މާލެއިން އެކަނި ލިބޭ އައިޑީކާޑުގެ ޚިދުމަތް ލާމަރުކަޒީ ނިޒާމުގެ ތެރެއިން ރައްޔިތުންނާއި ގާތުން ދެއްވުމަކީ ރައީސްގެ ވައުދުފުޅެކެވެ.

މި ވަޢުދުފުޅާ އެއްގޮތަށް ޑިޕާޓްމަންޓް އޮފް ނެޝަނަލް ރެޖިސްޓްރޭޝަނުން މިހާރު ވަނީ ވިލިމާލެ އީ-ބްލޮކް އަދި އުމަރު ޒާހިރު ބިލްޑިނގްގެ އިތުރުން ހުޅުމާލެ ވިނަރެސް ޓަވަރ 02ގެ ފުރަތަމަ ފަންގިފިލާއިން އައިޑީ ކާޑުގެ ޚިދުމަތް ރައްޔިތުންނަށް މިއަދު ދޭން ފަށާފައެވެ.

ޑީއެންއާރު އޮންލައިން ޕޯޓަލްއެއް ޤާއިމުކޮށް އަމިއްލައަށް ކާޑަށް ހުށަހެޅޭގޮތް މިދިޔަ އަހަރުގެ މާރޗު މަހުގެ ތެރޭގައި ވަނީ ހަމަޖައްސާފައެވެ. އަދި ކާޑު ޕްރިންޓުކުރުމަށް ފަހު، ޑީއެންއާރުން އެ މީހަކު ހުރި ރަށެއްގެ ކައުންސިލަށް ކާޑު ފޮނުވޭނެ ޚިދުމަތްވެސް ވަނީ މިއަހަރު ތަޢާރަފްކޮށްފައެވެ.